ဥာဏ်အလင်းတို့၏ အရှင်သခင်(ကျောက်ယွမ်)

အခန်း၇။ သိုသိုသိပ်သိပ်နေချင်တောင် နေမရဘူး

အခန်း၇။ သိုသိုသိပ်သိပ်နေချင်တောင် နေမရဘူး

ဂျိဟာသည် ချင်ရှုကို အသိပေးလိုက်ပြီးသည့်နောက် ဆေးဖော်ခန်းထဲက ကျောက်ယွမ်ကို ကြည့်လိုက်လေသည်။

သူမျက်နှာထက်တွင်တော့ လှောင်ပြောင်နေလို‌သောအပြုံးနှင့်။

ကျောက်ယွမ် ခုနက ပြလိုက်သည့်ခွန်အားသည် သူ့အား အမှန်တကယ်ကို ထိတ်လန့်သွားစေခဲ့သည်။ တကယ်တော့ ကျောက်ယွမ်၏ ခွန်အားကို သူ့အောက်တွင်ရှိသည်ဟုပင် ပြောမရတော့ချေ။

သို့သော်လည်း ကျောက်ယွမ်က အခွင့်အလမ်းတစ်ခုခုနှင့် ကြုံကြိုက်ခဲ့ရနိုင်သည်ကို တွေးမိသည့်အခါမှာတော့ စိတ်သက်သာရာရသွားလေသည်။ အခွင့်အလမ်းများအပေါ် မှီခိုနေရသည့် လူတစ်ယောက်မှာ ‌သူ့အနေနှင့် စကားထဲထည့်ပြောရန်ပင်မလိုချေ။

*အခု ကျောက်ယွမ်က ဆေးလုံးတွေသန့်စင်ဖို့ပါကြိုးစားနေတာလား။ အဲ့တာက မလွန်လွန်းဘူးလား။*

ဆေးပညာနှင့်ပတ်သတ်လျှင် ဂျိဟာကလည်း ပါရမီပါသည်ဟုပြော၍ရပေသည်။ သူက အဂ္ဂိရက်ခန်းမတွင်ပင် အလုပ်သင်ဖြစ်နေပြီဖြစ်သည်။ သူသည် တရားဝင်ဆေးဖော်သူမဖြစ်သေးသော်လည်း သူ့ဆရာ၏ အသိအမှတ်ပြုမှုကိုရရှိထားလေသည်။

အလုပ်သင်တွေသည် မည်မျှပင် ပါရမီရှိပါတည်ဖြစ်စေ သူတို့အနေနှင့် အတွေ့အကြုံရှိသည့် သင်ပြပေးမည့်သူလိုအပ်လေသည်။

ဆေးဖော်သူတိုင်း ဤတိုက်ကြီး၌ အလေးစားခံကြရသည်။

အဘယ့်ကြောင့်ဆိုသော် ဆေးဖော်သူများသည် ရှားပါရသောကြောင့် ဖြစ်လေသည်။ လေ့ကျင့်ရသည်မှာလည်း အလွန်ခက်ခဲလေသည်။ ထို့အပြင် ဆေးဖော်သူတစ်ယောက်ဖြစ်လာရန် အလွန်များပြားသော ဆေးအမယ်များနှင့်လေ့ကျင့်ရန်လိုအပ်ပေသည်။

အင်အားစုကြီးများက ဆေးဖော်သူတစ်ယောက်ရရှိရန် အစွမ်းကုန်ကြိုးစားကြမည်ဖြစ်ပေသည်။ သူတို့၏ အဆင့်အတန်းက အလွန်မြင့်မားလေသည်။

ယခု ကျောက်ယွမ်သည် သင်ကြားပေးမည့်သူ တစ်ယောက်မှလည်းမရှိဘဲ သူ့ဟာနှင့်သူ ဆေးဖော်ရန်ကြိုးစားနေလေသည်။ ဤသည်က စိတ်ကူးယဉ်‌နေခြင်းမဟုတ်လျှင် ဘာများလဲ။