Chapter 10
April 11, 2024
🌱Arc 1 [ ကျောင်းတွင် လယ်စိုက်ခြင်း ]Ch 10
အပေးအယူလေးတစ်ခု
စွေ့ချီချောင်း၏အားထုတ်မှုကြောင့် ပထမကန်တင်းတွင် ငရုတ်ဆီကိုခဏဖယ်ထားလျှင်ပင် စုစုပေါင်း ဟင်းလျာခုနစ်မျိုးအထိ ရှိလာပြီဖြစ်၏။ အာလူးနှပ်နှင့် ကြက်ဥမွှေကြော်အပြင် သူတို့ထံ၌ ငရုတ်သီးကြက်ကြော်၊ အမဲရင်ပုံသားမုန်လာဥချက်၊ ငါးအရသာ ဝက်သားနုတ်နုတ်စဉ်းဟင်း၊ ဆလတ်ရွက်မွှေကြော်၊ ရေညှိနှင့်ဝက်နံရိုးစွပ်ပြုတ်ရှိနေချေပြီ။
သူတို့၏လက်ရှိမီနူးတွင် ရွေးချယ်စရာအများအပြားမရှိသော်လည်း ၎င်းက ကျောင်းသားအများစု၏ အခြေခံလိုအပ်ချက်များကို ဖြည့်ဆည်းပေးနိုင်သည်။
စွေ့ချီချောင်းက CUကျောင်းသားများ၏ အကြံပြုချက်အတိုင်း မုန့်လုပ်နည်းများကိုလည်း လေ့လာခဲ့သည်။ မည်သို့ပင်ဖြစ်စေ သူ့အနေနှင့် ပထမကန်တင်း၏နံနက်စာမီနူးကိုလည်း မွမ်းမံပြင်ဆင်ရသေး၏။
ပထမကန်တင်း၏ မနက်စာမီနူးအကြောင်းကိုပြောရလျှင် သူတို့တည်ခင်းသော မနက်စာဟင်းပွဲများက နာမည်ဆိုးနှင့်ကျော်ကြားလေသည်။ သူတို့၏မွှေကြော်ဟင်းလျာများမှာ ၎င်းတို့ချည်းသက်သက်ပင် ဆိုးဝါးလှပြီဖြစ်၏။ သို့သော် စားဖိုမှူးများက ထိုဟင်းလျာများကို သူတို့၏မုန့်ပေါင်းဖိုထဲကိုထည့်ပြီး ဘန်းမုန့်ပြုလုပ်ကာ ဖက်ထုပ်ထဲကို အဆာသွတ်လိုက်သည့်အခါတွင်မူ ကံကောင်းသူများက ငရုတ်သီးစိမ်းရောထားသည့်အသားကြော်နှင့် ကြက်သွန်မြိတ်အမဲသားဟင်းကို အစာသွတ်ထားသည့်တစ်ခုကို ရနိုင်မည်ဖြစ်၏။ ကံဆိုးသူများအနေဖြင့် စတော်ဘယ်ရီသီးကြော်နှင့် အသားအဆာသွတ်ကို ရလိမ့်မည်သာ။
ကျောင်းသားတွေက စားရောစားချင်ကြမှာတဲ့လား...
စွေ့ချီချောင်းက သူ့ဗဟုသုတများကိုအသုံးချ၍ ဟင်းချက်နည်းနှစ်မျိုးကို ဖန်တီးပေးခဲ့သည်။ တစ်မျိုးမှာ အဆီနည်းအမဲသားပါသော ဆန်ခေါက်ဆွဲဖြစ်ပြီး ကျန်တစ်မျိုးမှာ ဝက်ပေါင်ခြောက် ကြက်ဥခေါက်ကြော်ကိတ် ဖြစ်သည်။
YOU ARE READING
လယ်စိုက်ကြမယ်
FantasyTitle - I Love Farming Description 💥 စွေ့ချီချောင်း၏ ရှေးဟောင်းဧကရာဇ်သွေး နိုးထလာခဲ့ချိန်တွင် သူက ဧကရာဇ်၏ ပင်ကိုဗီဇကို အရူးအမူးလယ်စိုက်ခြင်းဖြင့် ဖိနှိပ်ခဲ့သည်။ ယန်တိ ရှန်းနုန်၏သွေးဖြစ်သော အရည်အသွေးမြင့်လယ်ယာစိုက်ပျိုးခြင်းကလည်း အာမခံချက်ရရှိသွာ...