ကျွမ်းကျင်စားဖိုမှူးစနစ် (ယွမ်ကျိုး)

အပိုင်း(၁၅)

ကျွမ်းကျင်စားဖိုမှူးစနစ် အပိုင်း(၁၅)

         
ကြက်ဥထမင်းကြော်စားပြီးနောက် ယင်ယာက လန်းဆန်းတက်ကြွသော စိတ်အခြေအနေဖြင့် သူမ၏အမှားကို သူမကိုယ်တိုင် အကြီးအကဲထံ ဝန်ခံခဲ့သည်။

ဤသည်ကား အလုပ်နှင့်ပတ်သက်သော စည်းမျဉ်းစည်းကမ်းဖြစ်သည်။ အထက်လူကြီးများသည် ရလဒ်ကိုသာ အာရုံစိုက်ကြပြီး မည်သည့်အကြောင်းကြောင့် မှားယွင်းခဲ့လဲ စိတ်မဝင်စားကြပေ။ သို့သော်လည်း ယင်ယာကိုယ်တိုင်က အမှားကို ဝန်ခံလာ၍ အထက်လူကြီး အတော်အတန် ကျေနပ်မိသည်။ ထို့နောက် သူမကို နှစ်သိမ့်သော စကားတချို့ ပြောကြားပြီး သူ့အခန်းမှ ထွက်သွားစေသည်။

ပြဿနာရပ်အားလုံးက အဆင်ပြေချောမွေ့သွား၍ ယင်ယာ၏စိတ်အခြေအနေ ပိုကောင်းမွန်လာသည်။

ကြက်ဥထမင်းကြော်က ကံကောင်းခြင်းကို ယူဆောင်လာပေးသည်ဟု ယူဆကာ သူမ၏ ဖုန်းကိုထုတ်လိုက် ပြီး Wechat တွင်  ပို့စ်တင်လိုက်သည်။

“ဒီနေ့ နေ့လည်ခင်းတုန်းက အရမ်းအရသာရှိတဲ့ ကြက်ဥထမင်းကြော်ကို စားခဲ့တယ်။ စားဖူးသမျှထဲမှာ အရသာ အရှိဆုံးပဲ။ ဒါကြောင့်မို့ ထပ်တလဲလဲ စားချင်စိတ် ဖြစ်နေတယ်”

မိန်းမလှလေး၏ ထောက်ခံအားပေးမှုကြောင့် သူမ၏ပို့စ်ကို ကြိုက်နှစ်သက်သူ ရာကျော် ရှိခဲ့သည်။ သူမ အသစ်တင်လိုက်သော ပို့စ်ကို ငေးကြည့်ပြီး ဒွိဟဖြစ်သော ခံစားချက်များ ဖြစ်ပေါ်နေသည့် အမျိုးသားများလည်း ရှိသည်။

ယွမ်ကျိုးက စနစ်မှ ပေးအပ်ထားသော တာဝန်ကို ပြီးမြောက်အောင် လုပ်ဆောင်ရန် လေးလေးနက်နက် စဥ်းစားရင်း အိပ်ရာမှ ထလာခဲ့သည်။

တခြားသော စားသောက်ဆိုင်များသည် သူတို့ဆိုင်ကို အရောင်းမြှင့်တင်ရန် Weibo နှင့် WeChat ကို အသုံးပြုလေ့ရှိသည်။ သူလည်း တစ်ခုခုတွင် ကြော်ငြာရန် စိတ်ကူးရသည်။

အချိန်အတော်ကြာအောင် စဉ်းစားပြီးနောက် ယွမ်ကျိုးက သူ့အကြံအစည်ကို အကောင်အထည် မဖော်ရန် ဆုံးဖြတ်ခဲ့သည်။ သူ့လို ရည်မှန်းချက်ကြီးမားပြီး ဉာဏ်ရည်ထက်မြက်သော ယောက်ျားကောင်းက သာမန်အချိန်မှာပင် QQ appကို အသုံးမပြုခဲ့သည့်အတွက် Weibo နှင့် WeChat ကို အသုံးပြုရန် အဆင်မပြေလောက်ပေ။